தற்போது 17-வது ஐ.பி.எல். 20 ஓவர் கிரிக்கெட் போட்டி வருகிற 22-ம் தேதி தொடங்குகிறது.
10 அணிகள் பங்கேற்கும் இந்த கிரிக்கெட் திருவிழாவின் தொடக்க லீக் ஆட்டத்தில் நடப்பு சாம்பியன் சென்னை சூப்பர் கிங்சும், பெங்களூரு ராயல் சேலஞ்சர்சும் சென்னை சேப்பாக்கத்தில் உள்ள எம்.ஏ.சிதம்பரம் ஸ்டேடியத்தில் மோதுகின்றன.
இந்த ஆட்டம் இரவு 8 மணிக்கு தொடங்குகிறது. முன்னதாக கண்கவர் கலை நிகழ்ச்சிகளுடன் தொடக்க விழா 6 மணிக்கு கோலாகலமாக ஆரம்பமாகிறது. அதில் திரை நட்சத்திரங்கள் கலந்து கொண்டு ஆட்டம், பாட்டு என்று விருந்து படைக்கிறார்கள்.
அதில் ஏ.ஆர். ரகுமானின் இசை நிகழ்ச்சி இருக்கும் என் எதிர்பார்க்கப்படுகிறது. அப்போது வழக்கமாக ஐ.பி.எல். போட்டிக்கான குறைந்தபட்ச விலை டிக்கெட்டுகள் ஸ்டேடியத்தில் உள்ள கவுண்ட்டரில் விற்கப்படும்.
அப்போது டிக்கெட் வாங்க ரசிகர்கள் முந்தைய நாள் இரவில் இருந்தே ஸ்டேடியத்தை சுற்றி திரளுவதால் தள்ளு முள்ளு ஏற்படுவதுடன், அவர்களை கட்டுப்படுத்த போலீசார் சிரமத்தை சந்திக்க வேண்டியது இருக்கும்.
இந்த முறை நாடாளுமன்ற தேர்தல் நடைபெறும் சமயத்தில் ஐ.பி.எல். போட்டி நடப்பதால் நேரடி டிக்கெட் விற்பனை மூலம் ஏற்படும் கூட்ட நெரிசல் பிரச்சினையை தவிர்க்கும் பொருட்டு ஆன்லைனில் மட்டுமே டிக்கெட் விற்பனை செய்ய வேண்டும் என்று இந்திய கிரிக்கெட் வாரியம் அறிவுறுத்தி இருந்தது.
அதன்படி சென்னை சேப்பாக்கத்தில் உள்ள எம்.ஏ.சிதம்பரம் மைதானத்தில் வருகிற 22-ம் தேதி இரவு 8 மணிக்கு நடைபெறும்.
சென்னை சூப்பர் கிங்ஸ்-பெங்களூரு ராயல் சேலஞ்சர்ஸ் அணிகள் இடையிலான தொடக்க லீக் ஆட்டத்துக்குரிய டிக்கெட் விற்பனை ஆன்லைன் மூலம் நாளை (திங்கட்கிழமை) காலை 9.30 மணிக்கு தொடங்கி நடைபெறும் என்று சென்னை சூப்பர் கிங்ஸ் அணி நிர்வாகம் அறிவித்துள்ளது.
PAYTM மற்றும் www.insider.in ஆகிய இணைய தளங்கள் மூலம் டிக்கெட்டுளை பதிவு செய்து பெற்றுக்கொள்ளலாம் என்று தெரிவிக்கப்பட்டுள்ளது. இந்த போட்டிக்கான குறைந்தபட்ச டிக்கெட் விலை ரூ.1,700 ஆகவும், அதிகபட்ச விலை ரூ.7,500 ஆகவும் நிர்ணயிக்கப்பட்டுள்ளது.
சிடிஇ ஸ்டாண்டின் கீழ்தளத்துக்கான டிக்கெட் ரூ.1,700-க்கும், இதன் மேல் தளத்துக்கான டிக்கெட் ரூ. 4 ஆயிரத்துக்கும், ஐஜெகே ஸ்டாண்டின் மேல் தளத்துக்கான டிக்கெட் ரூ.4 ஆயிரத்துக்கும், இதன் கீழ்தளத்துக்கான டிக்கெட் ரூ.4,500- க்கும், கேஎம்கே ஸ்டாண்டின் பால்கனிக்கான டிக்கெட் ரூ.7,500-க்கும் விற்பனை செய்யப்படுகிறது.
ஆன்லைனில் ஒரு நபருக்கு 2 டிக்கெட் விற்பனை செய்யப்படும். தொடக்க ஆட்டத்துக்கு மாலை 4.30 மணி முதல் ரசிகர்கள் ஸ்டேடியத்துக்குள் அனுமதிக்கப்படுவார்கள்.
பிளாஸ்டிக் பொருட்கள், தண்ணீர் பாட்டில், உணவு பொருட்கள், புகையிலை உள்ளிட்டவற்றை ஸ்டேடியத்துக்குள் எடுத்து செல்ல அனுமதி கிடையாது என்று குறிப்பிடப்பட்டுள்ளது.
