ஆந்திர முதல்வராக சந்திரபாபு நாயுடு பதவியேற்றுக் கொண்ட விழாவில், புதுச்சேரி முன்னாள் ஆளுநர் தமிழிசை சவுந்தரராஜனை அழைத்து அமித்ஷா கண்டித்தது பெரும் பரபரப்பை ஏற்படுத்தியுள்ளது. இந்த வீடியோ சமூக வலைதளங்களில் வைரலாகி வருகிறது.
ஆந்திர மாநிலத்தின் முதல்வராக 4-வது முறையாக தெலுங்கு தேசம் கட்சி தலைவர் சந்திரபாபு நாயுடு விஜயவாடா அருகே ஏற்பாடு செய்யப்பட்டிருந்த பிரம்மாண்ட விழாவில் பதவியேற்றுக்கொண்டார்.
அதில் பிரதமர் நரேந்திர மோடி, அமித்ஷா, ஜெ.பி.நட்டா, நிதின் கட்கரி, ரஜினிகாந்த், சிரஞ்சீவி, ஓ.பன்னீர் செல்வம் உள்ளிட்டோர் கலந்து கொண்டு சிறப்பித்தனர். ஜனசேனா கட்சி தலைவர் பவன் கல்யாண் அமைச்சரானார். மேலும் 23 பேர் அமைச்சர்களாக பதவியேற்றனர்.
இந்த விழாவில், புதுச்சேரி முன்னாள் ஆளுநர் தமிழிசை சவுந்தரராஜனும் கலந்து கொண்டார். விழா மேடைக்கு வந்த தமிழிசை சவுந்தரராஜன், மத்திய உள்துறை அமைச்சர் அமித்ஷாவுக்கு வணக்கம் தெரிவித்தார். அப்போது அமித்ஷா, தமிழிசையை அழைத்துப் பேசினார்.
தமிழிசை ஏதோ சொல்ல வர, அதை அமித்ஷா மறுப்பது போல் சைகை காட்டி பேசும் வீடியோ சமூக ஊடகங்களில் வைரலானது. பாஜகவின் உள்கட்சி விவகாரத்தை பொதுவெளியில் பேசியதற்காக, தமிழிசையை அமித்ஷா கண்டித்ததாக கூறப்படுகிறது.
முன்னதாக, நடந்து முடிந்த மக்களவை தேர்தலில், பாஜக தனியாக கூட்டணி அமைத்து தேர்தலைச் சந்தித்தது. இந்த தேர்தலில், புதுச்சேரி மற்றும் தெலங்கானா மாநில ஆளுநராக பதவி வகித்து வந்த தமிழிசை சவுந்தரராஜன்,
தனது பதவியை ராஜினாமா செய்து விட்டு, பாஜக சார்பில் தென் சென்னை தொகுதியில் போட்டியிட்டு, தோல்வியைத் தழுவினார். அதை தொடர்ந்து நடந்த செய்தியாளர்கள் சந்திப்பில் பேசிய அவர்,
தமிழகத்தில் அதிமுக உடன் கூட்டணி அமைத்திருந்தால், அதிக இடங்களில் வெற்றி பெற்றிருக்கலாம் என்று கூறியிருந்தார். இதேபோல், தேர்தல் தோல்விக்குப் பிறகு, செய்தியாளர்களைச் சந்தித்த பாஜக மாநிலத்தலைவர் அண்ணாமலை,
இந்த தேர்தலில் தமிழகத்தில் பாஜகவின் வாக்கு சதவீதம் அதிகரித்திருப்பதாகவும், கணிசமான தொகுதிகளில் பாஜக இரண்டாம் இடத்தைப் பிடித்திருப்பதாகவும் கூறியிருந்தார். பாஜகவின் முன்னாள் தலைவர்களின் கருத்து அக்கட்சியினரிடையே பெரும் குழப்பத்தை ஏற்படுத்தியது.
இந்த நிலையில், ஆந்திர முதல்வர் சந்திரபாபு நாயுடு பதவியேற்பு விழாவில், தமிழிசையை அழைத்து அமித்ஷா கண்டித்தது போன்ற வீடியோ வெளியாகி இருப்பது கவனிக்கத்தக்கது.
