10 மணி முதல் இரவு 8 மணி வரை., அடடே.! இது நல்லா இருக்கே.!

0
49
அமைச்சர் முத்துசாமி

டாஸ்மாக் என்றால் அமைச்சர் செந்தில் பாலாஜி தான் நினைவுக்கு வருவார். முதலமைச்சர் மு.க.ஸ்டாலின் தலைமையிலான திமுக அரசில் வருவாய் கொட்டும் முக்கியமான துறைக்கு பொறுப்பேற்று
கஜானாவிற்கு வலுசேர்க்க பல்வேறு நடவடிக்கைகள் எடுத்தார். இந்த சூழலில் பாட்டிலுக்கு 10 ரூபாய் கமிஷன் என சர்ச்சை வெடித்து 10 ரூபாய் செந்தில் பாலாஜி என்ற கெட்டப் பெயரும் வைரலானது.
தற்போது ED ரெய்டு, கைது, நீதிமன்ற வழக்குகள் என புழல் சிறை பக்கம் சரண்டராகியுள்ளார்.

மறுபுறம் அமைச்சர் முத்துசாமி வசம் டாஸ்மாக் துறை ஒப்படைக்கப்பட்டது. இதையடுத்தும் சர்ச்சைகள் ஓய்ந்தபாடில்லை. 5 ரூபாய் அமைச்சர் தொடங்கி சட்டவிரோத பார்களில் அடிதடி சம்பவங்கள் வரை பரபரப்பிற்கு பஞ்சமில்லை. இதில் லேட்டஸ்ட் சம்பவங்கள் திருநெல்வேலி மற்றும் விருதுநகர் ஆகிய மாவட்டங்களில் நடந்துள்ளன. அதாவது, விருதுநகர் மாவட்டத்தில் உள்ள கடை எண் 11890ல், டாஸ்மாக் மேற்பார்வையாலர் மாசிலாமணிக்கு பெரிய சம்பவம் அரங்கேறியுள்ளது.

இவர் மேற்பார்வை செய்யும் டாஸ்மாக் கடையின் அருகே லைசென்ஸ் வாங்காத சட்டவிரோத பார் ஒன்று செயல்பட்டு வந்தது. சட்ட திட்டங்களின் படி அந்த பாரை மூட வேண்டும் என்று வலியுறுத்தியுள்ளார். இதுதொடர்பாக மாவட்ட மேலாளருக்கும் கடிதம் எழுதியிருக்கிறார். ஆனால் பார் ஊழியர்கள் ஒன்று சேர்ந்து மாசிலாமணியை அடி வெளுத்து விட்டனர். தற்போது படுகாயம் அடைந்து மருத்துவமனையில் சிகிச்சை பெற்று வருகிறார்.

இதேபோல் திருநெல்வேலி மாவட்டத்தில் உள்ள கடை எண் 10882ல் பாருக்கு குடிக்க வந்த ஒரு கும்பல் திடீரென அருகிலுள்ள டாஸ்மாக் கடைக்குள் புகுந்து அடித்து நொறுக்கி கல்லா பெட்டியை தூக்கி கொண்டு ஓடிவிட்டது. அங்கிருந்த டாஸ்மாக் ஊழியர்கள் தற்போது மருத்துவமனையில் இருக்கின்றனர். இதுபோன்ற சம்பவங்கள் டாஸ்மாக் ஊழியர்கள் மத்தியில் கலக்கத்தை ஏற்படுத்தியுள்ளது.

இவர்கள் அனைவரும் ஒப்பந்த ஊழியர்கள் என்பதால் டாஸ்மாக் கடைகளின் செயல்பாட்டில் சிக்கல் வரும் என அஞ்சப்படுகிறது. இந்நிலையில் பார்கள் தான் பிரச்சினைக்கு முக்கிய காரணமாக இருக்கின்றன. எனவே டாஸ்மாக் கடைகளை ஒட்டியுள்ள பார்களை மூட வேண்டும் என்று முதலமைச்சர் மு.க.ஸ்டாலினுக்கு டாஸ்மாக் ஊழியர்கள் சங்கம் கோரிக்கை விடுத்துள்ளது.

சென்னையில் கூட பலமுறை எச்சரிக்கை விடுத்தும் டாஸ்மாக் பார்கள் மூடப்படாமல் சட்ட விரோதமாக இயங்கி வருவதாக தகவல்கள் தெரிவிக்கின்றன. இவற்றை எல்லாம் உடனடியாக
மூட வேண்டாமா? என்ற கேள்வி எழுகிறது. இதுதவிர டாஸ்மாக் நேரத்திலும் மாற்றம் வேண்டும் என்கின்றனர். ஏனெனில் தற்போது நண்பகல் 12 மணி முதல் இரவு 10 மணி வரை டாஸ்மாக் கடைகள் செயல்பட்டு வருகின்றன.

லேட் நைட் ஆவதால் அசம்பாவித சம்பவங்கள் நடக்க அதிக வாய்ப்பிருக்கின்றன. எனவே காலை 10 மணி முதல் இரவு 8 மணி வரை என கடைகள் செயல்படும் நேரத்தை மாற்ற வேண்டும் என்று வலியுறுத்தியுள்ளனர். இதுதவிர டாஸ்மாக் கடைகளில் பாதுகாப்பிற்கு தனியாக போலீஸ் குழு ஒன்றை அமைக்கலாம். இவர்கள் அங்கு நடக்கும் சச்சரவுகளை ஒடுக்கி பிரச்சினைகள்
வராமல் பார்த்து கொள்வர் என்று அறிவுறுத்துகின்றனர்.

LEAVE A REPLY

Please enter your comment!
Please enter your name here