நெய்வேலி என்.எல்.சி முன்பாக பாமக நடத்திய போராட்டத்தில் பாமகவை சேர்ந்த பலர் கைது செய்யப்பட்டு மதுரை மத்திய சிறையில் நீதிமன்ற காவலில் வைக்கப்பட்டுள்ளனர். பாமகவை சேர்ந்த 18 பேரை பாமக தலைவர் அன்புமணி ராமதாஸ் சந்தித்து பேசினார்.
55 பேர் கைது:
பின்னர் அன்புமணி ராமதாஸ் நிருபர்களிடம் கூறியதாவது,
பாகமவை சேர்ந்த 55 பேரை மண்ணுக்கும், மக்களுக்குமாக போராடியதற்காக காவல்துறை கைது செய்துள்ளது. கைது செய்யப்பட்ட பாமகவினரை உடனடியாக விடுவிக்க வேண்டும். தமிழக அரசு நிலங்களை என்.எல்.சி க்காக கையகப்படுத்த கூடாது.
முதல்-அமைச்சர்:
நிலக்கரி எடுத்த பின்னர் என்.எல்.சி நிலங்களை அழித்து வருகிறது. தமிழகத்தில் இனி நிலக்கரி சுரங்கம் அமைக்கப்படாது என முதல்-அமைச்சர் 3 மாதங்களுக்கு முன்னர் தெரிவித்தார். தற்போது 3 போகம் விளையும் விலை நிலங்கள் அழிக்கப்பட்டு வருகின்றது.
என்.எல்.சி 3-ம் சுரங்கம் அமையுமா? அல்லது அமையாதா? என தமிழக அரசு விளக்க வேண்டும்.
என் எல் சி பிரச்சினை:
என்.எல்.சி பிரச்சினை தமிழக மக்களின் பிரச்சினையாக மாறியுள்ளது. தமிழக அரசு விளை நிலங்களை பாதுகாக்க வேண்டும். தமிழ்நாடு மின்மிகை மாநிலமாக தற்போது மாறி உள்ளது. ஆனால் என்.எல்.சி மின்சாரத்தை வெளி மாநிலங்களுக்கு விற்பனை செய்கிறது. என்.எல்.சி நிறுவனத்துக்கு தமிழக அரசு ஏன் உதவியாக உள்ளது என்று எனக்கு தெரியவில்லை.
பாமக நிச்சயமாக போராடும்:
அரசியல் நோக்குடன் பாமக போராட்டம் நடத்தவில்லை. மண்ணுக்கும், மக்களுக்கும் பிரச்சினை என்றால் பாமக நிச்சயமாக போராடும். எதிர்கட்சி தலைவர் ராகுல்காந்திக்கு கிடைத்த தண்டனை மிகப்பெரிய தண்டனை. சாதாரண வழக்கில் ராகுல் காந்திக்கு இவ்வாறு தண்டனை வழங்கப்பட்டது. தற்போது ராகுல்காந்தி வழக்கில் தீர்ப்பு விபரம் தெரியவில்லை. தீர்ப்பின் விபரம் கிடைத்தவுடன் அதைப்பற்றி பேசுகிறேன்.
ராகுல்காந்தி வழக்கு:
ராகுல்காந்தி வழக்கும் பாஜக தலைமையிலான மத்திய அரசுக்கும் எந்த சம்பந்தம் இல்லை. பாமக டெல்லியில் தேசிய ஜனநாயக கூட்டணியில் அங்கம் வகிக்கிறது. ஆனால் தமிழ்நாட்டில் தேசிய ஜனநாயக கூட்டணியில் பாமக அங்கம் வகிக்கவில்லை. 2026 -ம் ஆண்டு பாமக ஒரு மித்த கருத்துகளுடன் உள்ள கட்சிகளுடன் பாமக தேர்தலை சந்திக்கும். இவ்வாறு அவர் கூறினார்.
