பரவும் புதிய வகை கொரோனா.! இங்கிலாந்தில் பரபரப்பு.!

0
69
புதிய வகை கொரோனா

இங்கிலாந்தில் பரவும் புதிய வகை கொரோனா, உலகம் முழுவதும் உள்ள மக்களிடம் மீண்டும் பதற்றத்தையும் எச்சரிக்கை உணர்வையும் ஏற்படுத்தியுள்ளது. கொரோனா பரவல் காரணமாக ஏற்பட்ட உயிரிழப்புகளும், உடல் நலப் பாதிப்புகளும் உலகம் முழுவதும் உள்ள மக்களை கடுமையாக பாதித்தது. கொரோனா பரவலைக் கட்டுப்படுத்த பல்வேறு நாடுகளில் விதிக்கப்பட்ட பொது முடக்கத்தால் உலகளவில் பொருளாதாரம் முடங்கியது. மக்கள் தங்கள் வாழ்வாதாரங்களை இழந்தனர். புயல் அடித்தாற்போல் ஓரிரு வாரங்களில் பல ஆண்டு சேமிப்புகளை இழந்தனர். கடனில் மூழ்கினர். தடுப்பூசி கண்டறியப்பட்டு பாதிப்பு கட்டுக்குள் வந்து சகஜ நிலைமை திரும்பினாலும் பொருளாதார ரீதியாக பலரும் அந்த பாதிப்பிலிருந்து மீளவில்லை.

புதிய வகை கொரோனா எரிஸ் (Eris):

கொரோனாவின் பல்வேறு திரிபுகள் அடுத்தடுத்து வந்தாலும் தடுப்பூசியால் அவை கட்டுப்படுத்தப்பட்டன. ஆனால் இங்கிலாந்தில் எரிஸ் என்ற புதிய வகை (Eris அல்லது EG.5.1)கொரோனா வைரஸ் வேகமாக பரவி வருகிறது. ஒமிக்ரான் தொற்றிலிருந்து திரிந்து உருவான எரிஸ் தொற்றை புதிய திரிபாக ஜூலை 31ஆம் தேதி தான் மருத்துவ வல்லுநர்கள் வகைப்படுத்தினர். இங்கிலாந்தில் கொரோனா பாதிப்பு உள்ள பத்தில் ஒருவருக்கு எரிஸ் வகை தொற்று உறுதியாகியுள்ளது.

எரிஸ் அறிகுறிகள்:

இந்த வகை தொற்றால் பாதிக்கப்படுபவர்களுக்கு மூக்கு ஒழுகுதல், தலைவலி, சோர்வு (லேசான முதல் கடுமையானது வரை),
தும்மல் மற்றும் தொண்டை புண் ஆகிய அறிகுறிகள் இருக்கும்.

யாரை அதிகம் பாதிக்கிறது?:

இந்த வகை கொரோனா தொற்று வயதானவர்களை அதிகம் பாதிக்கிறது. இரு வாரங்களில் வயதானவர்கள் மருத்துவமனையில் அனுமதிக்கப்படும் எண்ணிக்கை அதிகரித்துள்ளது. 75 வயதுக்கு மேற்பட்டவர்களிடம் இந்த தொற்று அதிகம் காணப்படுகிறது.

பரவலுக்கு என்ன காரணம்?:

இங்கிலாந்தில் தற்போது உள்ள மோசமான வானிலையும், குறைந்த நோய் எதிர்ப்பு சக்தியும் இந்த எரிஸ் பரவலுக்கு வழி வகுத்துள்ளதாக மருத்துவ நிபுணர்கள் கூறுகின்றனர்.

செப்டம்பரில் அடுத்த அலை?:

பெரும்பாலான மக்கள் தடுப்பூசி செலுத்தி ஒன்றரை ஆண்டுகளுக்கும் (18 மாதங்கள்) அதிகமான காலம் ஆனதால் எரிஸ் (Eris), ஆர்க்ட்ரஸ் (Arcturus) மற்றும் ஒமிக்ரான் (Omicron) திரிபு வைரஸ்களால் உருவாகும் அலை செப்டம்பர் மாதத்திற்குள் கணிசமாக அதிகரிக்கும் என்று நிபுணர்கள் எச்சரிக்கின்றனர்.

பள்ளிகள் மீண்டும் திறப்பு:

ஜூலை இறுதி வாரம் முதல் செப்டம்பர் முதல் வாரம் வரை இங்கிலாந்தில் கோடை விடுமுறை காலம் ஆகும். மீண்டும் மாணவர்கள் பள்ளிகளுக்கு திரும்பும் போது தொற்று பரவல் அதிகரிக்கலாம் என்கிறார்கள். பள்ளிகள் திறக்கும் போது கட்டுப்பாடுகள் விதிக்கப்பட வேண்டும் என்று அறிவுறுத்தல்கள் வருகின்றன.

LEAVE A REPLY

Please enter your comment!
Please enter your name here