நாடாளுமன்ற தேர்தல் ஏப்ரல் மாதம் தொடங்கி 7 கட்டங்களாக நடந்து முடிந்தது. வாக்கு எண்ணிக்கை ஜூன் 4 ஆம் தேதி நடந்தது. வாக்கு எண்ணிக்கையின் முடிவில் பாஜக கூட்டணி 296 இடங்களை கைப்பற்றியது. பாஜக 240 இடங்களில் வென்றது. கூட்டணி கட்சிகளின் ஆதரவுடன் பாஜக மீண்டும் ஆட்சியமைக்க உள்ளது.
தேர்தல் வாக்கு எண்ணிக்கையின் போது திருச்சி நாடாளுமன்ற தொகுதியில் போட்டியிட்ட சுயேட்சை வேட்பாளர் ஒருவர் ஒவ்வொரு சுற்றிலும் கணிசமான வாக்குகளை பெற்று முகவர்களை ஆச்சர்யப்படுத்தினார்.
இந்த தொகுதியில் மதிமுக வேட்பாளர் துரை வைகோ சுமார் 3 லட்சம் வாக்குகள் வித்தியாசத்தில் வெற்றி பெற்றார். வாக்கு எண்ணிக்கையின் முடிவில் சுயேட்சை வேட்பாளர் செல்வராஜ் 14,796 வாக்குகளை பெற்றார்.
மற்ற சுயேட்சைகள் யாரும் இவ்வளவு வாக்குகள் பெறாத நிலையில் தனியார் நிறுவனத்தில் வேலை பார்க்கும் செல்வராஜ்-க்கு இவ்வளவு செல்வாக்காக என அரசியல் கட்சியினர் குழம்பினர்.
தேர்தலில் வேட்புமனு தாக்கல் செய்ததோடு சரி, அந்த நபர் பிரச்சாரம் கூட செய்யவில்லை என்கின்றனர் உள்ளூர் அரசியல்வாதிகள். ஒரு வழியாக இந்த 14,000 வாக்குகள் விழுந்ததற்கான காரணத்தை அவர்களே கண்டறிந்தனர். மதிமுகவுக்கு இந்த முறை பம்பரம் சின்னம் கிடைப்பதில் சிக்கல் இருந்தது.
நீதிமன்றம் வரை சென்றும் பம்பரம் கைக்கு கிடைக்கவில்லை. எங்க கட்சி சின்னத்தில் தான் போட்டி என துரை வைகோவும் பிடிவாதமாக இருந்தார். இறுதியாக நீதிமன்றம் மதிமுகவுக்கு தீப்பெட்டி சின்னம் வழங்கியது.
இந்த சின்னத்தை பொதுமக்கள் மத்தியில் கொண்டு சேர்த்த திமுக மற்றும் மதிமுக கட்சி தோழர்கள் துரை வைகோவை வெற்றி பெற செய்துள்ளனர். செல்வராஜ் போட்டியிட்ட பிஸ்கட் சின்னம் செவ்வக வடிவத்தில்,
மதிமுக வேட்பாளர் துரை வைகோ போட்டியிட்ட தீப்பெட்டி சின்னத்தை போன்றே வாக்குப்பதிவு எந்திரத்தில் இருந்துள்ளது. இதனால் ஏற்பட்ட சின்ன (குழப்பத்தில் வாக்காளர்கள் பலர் பிஸ்கட் சின்னத்துக்கு வாக்களித்து இருக்கக்கூடும் என அரசியல் கட்சியினர் தெரிவித்தனர்.
திருச்சி தொகுதிக்கு உட்பட்ட 6 சட்டமன்ற தொகுதிகளிலும் பரவலாக வாக்குகள் கிடைத்தும், மொத்தம் 14,796 வாக்குகளை பெற்றுள்ளார்.
திருச்சி தொகுதியில் அமமுக வேட்பாளர் செந்தில் நாதனுக்கு அடுத்தபடியாக சுயேச்சை வேட்பாளர் செல்வராஜ் 5-வது இடத்தை பிடித்துள்ளார். இவருக்கு அடுத்தபடியாக நோட்டாவுக்கு 13,849 வாக்குகள் கிடைத்துள்ளது.
Leave a Reply
You must be logged in to post a comment.