திமுகவில் பல அமைச்சர்கள் ஊழல் வழக்கில் கைது செய்யப்படுவார்கள் என்ன அதிமுக பொதுச் செயலாளர் எடப்பாடி பழனிசாமி தெரிவித்தார். கிருஷ்ணகிரி மாவட்டம், காவேரிப்பட்டணத்தில் நேற்று அதிமுக பொதுச் செயலாளர் எடப்பாடி பழனிச்சாமி நிருபர்களுக்கு பேட்டி அளித்தார். அப்போது அவர் கூறியதாவது;
வடகிழக்கு பருவமழை தொடங்குவதற்கு ஒரு வாரத்திற்கு முன்பே இந்திய வானிலை ஆய்வு மையம் அதிக கனமழை பெய்யும் என எச்சரிக்கை விடுத்தது. ஆனால் திமுக அரசு அதனை பொருட்படுத்தாமல் அலட்சியப்படுத்தியதால் தான், சென்னை மக்கள் பல்வேறு துன்பங்களுக்கு ஆளானார்கள். முதலமைச்சர் மு.க ஸ்டாலின் பருவமழைக்கு முன்பே உயர் அதிகாரிகளை அழைத்து ஆலோசனை நடத்தவில்லை. அதிமுக ஆட்சி காலத்தில் பருவமழை தொடங்குவதற்கு முன்பே ஆலோசனை நடத்தி பல்வேறு முன்னெச்சரிக்கை நடவடிக்கைகள் மேற்கொள்ளப்பட்டன. சென்னையில் மண்டல வாரியாக ஒரு ஐ.ஏ.எஸ் அதிகாரி நியமிக்கப்பட்ட அரசு ஆலோசனைப்படி மீட்பு பணிகளில் துரிதமாக ஈடுபட்டனர். அதிமுக ஆட்சியின் போது அம்மா உணவகங்களில் தரமான உணவுகள் தயாரித்து வழங்கப்பட்டன. இதில் ஒன்றை கூட தமிழக அரசு செயல்படுத்தவில்லை.
மாறாக சில இடங்களில் அம்மா உணவகங்கள் முடக்கப்பட்டும், மூடப்பட்டும் உள்ளன. அதிமுக ஆட்சியில் சென்னையில் 2400 கிலோமீட்டர் அளவிற்கு மழைநீர் வடிகால் அமைக்கும் பணிகள் தொடங்கப்பட்டு 1246 கிலோ மீட்டர் தூரத்திற்கு பணிகள் முடிக்கப்பட்டன. ஆனால் கடந்த 2 1/2 ஆண்டுகளாக கவுன்சிலர் முதலமைச்சர்கள் வரை கமிஷனுக்கு ஆசைப்பட்டு, மீதமுள்ள பணிகளை முடிக்காமல் விட்டுள்ளனர். மிக்ஜம் புயலால் சென்னை மாவட்டத்தில் ஏற்பட்ட பேரிடருக்கு பிறகும் அரசு விழித்துக் கொள்ளவில்லை. இந்த நிலையில் நெல்லை, தூத்துக்குடி, தென்காசி மற்றும் கன்னியாகுமரி உள்ளிட்ட 4 மாவட்டங்களில் மழை வெள்ளத்தால் பொதுமக்கள் அவதி அடைந்து வருகின்றனர். தூத்துக்குடி மாவட்டத்தில் அதிமுக அரசால் தொடங்கப்பட்டு, 80 சதவீத பணிகள் முடிந்த பக்கிம் கால்வாய் திட்டத்தையும் திமுக அரசு செயல்படுத்தவில்லை. இதனால் அப்பகுதியில் 7 ஆயிரம் பொதுமக்கள் மழை வெள்ளத்தில் சிக்கி தவித்தனர். இந்த அரசு எதற்கெடுத்தாலும் ஒரு குழுவை மட்டுமே அமைகிறது. திராவிட மாடல் அரசு குழு அரசாக செயல்படுகிறது.
திமுக அரசு செயலற்ற அரசாக உள்ளது. இந்திய கூட்டணியில் பெரும் குழப்பம் ஏற்பட்டுள்ளது. வேற்றுமைகள் உள்ள 26 கட்சிகள் இணைந்து ஒரு அமைப்பை ஏற்படுத்தி உள்ளன. அதில் ஒரு தலைவர் இந்தியில் பேச வேண்டும் என்கிறார். ஒருவர் எதிர்ப்பு தெரிவிக்கிறார். தற்போது இந்த கூட்டணியில் புகைச்சல் ஏற்பட்டு விட்டது. எப்போது தீ வரும் என்று தெரியவில்லை. அடுத்த கூட்டம் நடக்குமா என்பது சந்தேகமாக உள்ளது. திமுகவில் இரண்டு அமைச்சர்கள் மட்டுமே தற்போது குற்றவாளிகள் என அடையாளம் காணப்பட்டுள்ளனர். திமுகவில் பல அமைச்சர்கள் ஊழல் வழக்கில் கைது செய்யப்படுவார்கள். கடந்த 10 ஆண்டுகால அதிமுக ஆட்சியில் தமிழகம் முன்னேற்றம் அடைந்தது. தற்போது திமுக ஆட்சியில் படுபாதாளத்திற்கு சென்று விட்டது. இவ்வாறு அவர் கூறினார்.
Leave a Reply
You must be logged in to post a comment.