“நரேந்திர மோடி, தொடர்ந்து மூன்றாவது முறையாக பதவியேற்க உள்ளார். இது ஒரு மிகப்பெரிய சாதனை. அவருக்கு என்னுடைய மனமார்ந்த பாராட்டுக்கள். அதேநேரம், இந்த மக்களவைத் தேர்தலில், இந்திய மக்கள் ஒரு வலுவான எதிர்க்கட்சியைத் தேர்ந்தெடுத்துள்ளனர்.
இது ஜனநாயகத்துக்கு ஓர் ஆரோக்கியமான அறிகுறி” என்று நடிகர் ரஜினிகாந்த் கூறியுள்ளார்.
டெல்லி குடியரசுத்தலைவர் மாளிகையில் நடைபெற்ற விழாவில் மோடி 3-வது முறையாக பிரதமராக பதவியேற்றார். இதை அடுத்து, டெல்லியில் நடைபெறும் பதவியேற்பு விழாவில் பங்கேற்பதற்காக, நடிகர் ரஜினிகாந்த் டெல்லி புறப்பட்டுச் சென்றார்.
முன்னதாக, சென்னை விமான நிலையத்தில் செய்தியாளர்களைச் சந்தித்த அவர், “மதிப்புக்கும், மரியாதைக்கும் உரிய நரேந்திர மோடி, தொடர்ந்து மூன்றாவது முறையாக பதவியேற்க உள்ளார். இது ஒரு மிகப்பெரிய சாதனை. அவருக்கு என்னுடைய மனமார்ந்த பாராட்டுக்கள்.
அதேநேரம், இந்த மக்களவைத் தேர்தலில், ஒரு வலுவான எதிர்க்கட்சியைத் தேர்ந்தெடுத்துள்ளனர். இது ஜனநாயகத்துக்கு ஓர் ஆரோக்யமான அறிகுறி” என்றார். பிரதமர் மோடியின் அடுத்த 5 ஆண்டு கால ஆட்சி குறித்த கேள்விக்கு பதிலளித்த அவர், “நன்றாகத்தான் இருக்கும் என்று எதிர்பார்க்கிறேன்” என்றார்.
முன்னதாக, நாடாளுமன்ற தேர்தல் 7 கட்டங்களாக நடைபெற்றது. கடந்த ஜூன் 4 ஆம் தேதி தேர்தல் முடிவுகள் அறிவிக்கப்பட்டன. அதில் பாஜக 240 இடங்களில் வெற்றி பெற்றது. எனினும், தனி பெரும்பான்மை (272) கிடைக்கவில்லை.
அதேநேரம், பாஜக தலைமையிலான தேசிய ஜனநாயகக் கூட்டணி (என்டிஏ) 293 இடங்களில் வென்று ஆட்சியை 3- வது முறையாக தக்கவைத்துக் கொண்டது. இதை அடுத்து, குடியரசு தலைவர் மாளிகையில் 9 ஆம் தேதி இரவு 7.15 மணிக்கு புதிய அரசு பதவியேற்பு விழா நடைபெறும் என அறிவிக்கப்பட்டது.
அதில், பிரதமர் மோடிக்கு குடியரசு தலைவர் திரவுபதி முர்மு பதவி பிரமாணமும் ரகசிய காப்பு பிரமாணமும் செய்து வைத்துள்ளார். இந்த நிகழ்ச்சியில் மத்திய அமைச்சர்களாகப் பதவியேற்றுக் கொண்டனர். இந்த தகவல் குடியரசுத் தலைவர் மாளிகையின் எக்ஸ் சமூக வலைதளத்தில் வெளிப்பட்டுள்ளது.
Leave a Reply
You must be logged in to post a comment.